Wellnessferien im Auerhahn 8. - 13. Juni 2014

Scho  zum 3. Mal händ mir 9 Fraue 5 herrlichi Ferietag im Hotel Auerhahn in Aha verbracht Am 8. Juni, am Pfingstsunntig am Morge sind mir 6 Fraue mit 2 Autos am 10i in Aha acho. ( die andere 3 Dame sind wäge Familiealäss erst am Abig zu euis cho) .Bi däm Prachtswätter sind mir dänn sofort losmarschiert am schöne See entlang nach Schluchsee. Es isch uuuu heiss gsi und zwar die ganz Wuche. Ich glaub de Summer 2014 hät vom Pfingstsunntig bis am Fritig stattgfunde.

 

Nach eme chüele Drink sind mir froh gsi, dass mir wieder d‘ Konus Charte gha händ und so sind mir in Zug igstiege und diräkt hinder em Hotel usgstiege. D‘ Lag vo dem Hotel isch eifach perfäkt.Nach em Z’Mittag händ mir euises Gepäck i d‘ Zimmer gfuget. Die Einte händ no chli länger müese warte, dänn die Zimmer müend ja au putzt werde. Aber mir händ ja Zit und Geduld, wie mers vo de Pensionierte cha erwarte. S’Bade händ dänn alli gnosse. De Herr Thoma hät sich öppis ganz Tolls ifalle la als Begrüessigsapero: Mir sind zu ere 1 stündige Rundfahrt iglade worde und zwar uf em neue Schiff, wo erst sit 3 Wuche in Betrieb gsi isch. S‘ Thomas und e paar Agstellti händ euis mit Sekt und herrliche Häppli verwöhnt. Mir sind euis vorcho, wie uf em Traumschiff irgendwo i de Karibik. Zum Z’Nacht isch dänn au no Trudi Weber zu euis gstosse.

Mäntig, 9.6.

Wie au die letschte Jahr isch am Morge vor em z’Morge Aquafit uf em Programm gstande. Aber oha, es isch en Instruktorin wie en Feldweibel am Beckirand gstande. Mir händ müese feststelle: da herrscht noch Zucht und Ordnung. Schüttle, Schüttle, Schulter unter Wasser, hepp,hepp, Team bilden!!! So e Leiterin würd euis Turnerinne öppe e Mal guettue!! D‘ Nelly hät tapfer mitgmacht, obwohl sie fascht versoffe isch…
Es isch en herrlich sunnige Tag gsi und so sind mir wie au alli andere Tag go wandere.Uf der andere Seesite, zerst dur de chüeli Wald und dänn über Wiese und Fälder hät de Wäg euis in Unterkrummenhof gführt. Will’s immer heisser worde isch händ mir beschlosse, mir laufed nüme witer, nei mir fahred mit em Schiff zrugg.Im Hotel nach em Bade sind alli uf em Liegistuhl igschlafe.( Das sind ebe Ferie )! Wills so schöne warme Abig gsi isch händ mir de Schlummerbächer vor em Hotel trunke. Aber nach de 10e sind mir ine züglet.

 

Am andere Morge hät es Schwitzer Ehepaar reklamiert, sie heged nöd chönne schlafe…..Aber das isch euis ……..eigentlich egal gsi!!!Ich glaub suscht händ euis alli sauguet möge, d’Hotel Gescht und au alli Agstellte..

Zistig, 10.6.

 

S‘ Aquafit isch vo ere junge tolle Frau gleitet worde, kein Feldweibel.
Per Bahn sind mir is Bäretal gfahre und witer mit em Bus a d‘ Talstation vom Feldberg. Mit 8er Gondle uf de Seebuckgipfel z’schwebe isch herrlich gsi. Verbi am Bismarck Denkmal händ mir z‘ Fuess i 45 Min. de 1493m höchi Feldberggipfel erreicht. De Wäg isch nöd asträngend gsi, also für alli machbar. Euisi ältischti Turnerin d’Nelly isch immerhin 84i. Aber sie hät die ganz Wuche alli Wanderige tip top mitgmacht. Wo mir wieder zur Gondelbahnstation cho sind händ mir e paar Rägetropfe gspürt, aber a de Talstation isch de Schauer scho wieder verbi gsi.Imene gmüetliche Rest.wie e Skihütte isch e chlini Pizza und es Bierli oder so scho herrlich gsi. Bim Sport Müller händ die Einte no e paar Euros liege la. De Namittag hät wieder es Schläfli uf em Liegistuhl abgrundet.

Mittwuch, 11.6.

 

Nach eme sehr agnähme Aquafit ( bimene Herr ) sind mir wieder per Bahn is Bäretal gfahre. Vo det hät en herrliche Wäg dur de chüel Tannewald diräkt an Titisee gführt. E gmüetlichi Rundfahrt uf eme ganz spezielle Schiff hät de Usflug krönt.S‘ Wandere git au Hunger und en feine Flammechueche oder es Salötli isch grad s‘ Richtige gsi.Nach em z’Nacht wo mir euis übrigens 2 Mal am Buffet händ chönne bediene und 3 Mal sind mir bedient worde, hät en Musiker i de Hotelhalle ufgspillt. Er hät d‘ Dameriege efang kännt und hät au nach euisem Gschmack gspillt. Nach em Gaballier sim Lied händ mir tanzet und de Abig mit ere Polonaise beändet.„Ihr habt ja eine Mega Party veranstaltet „ hät e jungi Källnerin gmeint. Die het euis vor 13 Jahr i de Süd Türkei sölle erläbe!!!!

Dunnstig, 12.6.

 

Scho wieder so en strahlende, sunnige Tag. Nach em strenge Hep und Schultere unter Wasser händ mir euis für e ruhigi Wanderig entschiede. Vom Staudamm sind mir alles am See entlang vo de andere Site als am 1. Tag im Unterkrummehof acho. Oha, e paar Rägetröpfe , das isch ganz ungwont gsi! Zum Glück händ mir wieder chönne i das moderni, tolli Schiff istiege.Im Hotel hät euis de Choch empfange und en Smoothis zum Probiere gä. ( das sind versch. Gmües und Frücht mit Iswürfel gmixt ). Aber Schwarzwälder Turte und en Kafi sind au perfäkt gsi.Nach em z‘ Nacht und em obligate Abigspaziergang sind mir no s’letscht Mal i de Hotelhalle zäme gsässe.

Fritig, 13.6.

 

De letschti Tag, scho bald häts gheisse Koffere packe. Vor em Hotel händ mir no welle d‘ Sunne echli gnüsse. Plötzlich isch de Herr Thoma uftaucht und hät euis allne en Apero bracht. „ Ihr chönd doch nöd so troche dasitze „ hät er gmeint.Fascht wie i de Hotel i de Schwiez!!! Mir händ euis im Auerhahn wieder sehr wohl gfühlt wie immer.Nach em z‘ Mittag sind mir alli per Zug nach Schluchsee gfahre und händ nomal die herrlich Schifffahrt uf em See gnosse.Nach de 5e isch es für alli heiwärts gange. Zum Glück duret ja d’Heifahrt nur knapp 1 Stund.Ich glaub, das isch ganz e tolli Wuche gsi. S‘ Wätter hät natürlich vill dezue bitreit. Will’s rächt heiss gsi isch händ mir das Mal ufs Lädele verzichtet und defür tolli Wanderige unternoh.Was mich bsunders gfreut hät, es sind immer alli is Aquafit, go Wandere, zabig no zämegsässe, also eifach e ganz tolli Kameradschaft. Für das wett ich allne ganz herzlich danke.

zurück zur Übersicht