Ferien im Bregenzerwald Hotel Krone in Au Vom 12. bis 17. Juni 2016

Wänn en Rädlikoffer am Sunntigmorge vor em Bahnhof ganz allei d‘ Strass aberollt, dänn isch d‘ Dameriege unterwägs. Aber zum Glück sind mir kein Lismerclub, sondern e Dameriege mit schnälle Bei !!! D‘Lis hät de Koffer sofort wieder z’rugg gholt.

Ja mir 12 Fraue händ das Jahr emal nüme welle in Schwarzwald sondern in Bregenzerwald nach Au.

Im Zug vo  Winterthur nach Bregenz händ mir bald gmerkt, dass die Züg nöd für vill Gepäck baue sind. Aber mir sind ja no jung und so sind die einte Füess halt uf de Koffer gläge.

In Bregenz sind mir vo 2 Büsli abgholt worde. De eint isch en perfekte Fahrer gsi, aber de ander isch schints gfahre wie en Strolch, so sind sicher alli froh gsi, wo mir nach ca. 50 Min. euises Ziel s’Hotel Krone in Au erreicht gha händ.

Mir sind nett empfange worde und nach eme 1. Drink uf de Terrasse häts sich aber doch de Hunger gmäldet.

S‘ 1. Restaurant  isch e Baustell gsi, im 2. hät e gschlossni Gsellschaft gässe, aber im 3.händs euis feini Süppli und Salöt uftischet.

Wo mir zum Restaurant us cho sind, häts agfange rägne und de Räge hät euis fast die ganz Wuche begleitet !!!!

S‘ Hallebad im Hotel isch chli gsi, aber de Wellnessbereich isch rächt gross und wunderschön gsi.

Jede Abig händ mir dörfe es feins 5 Gang Menue gnüsse, au de obligat Schlummerbecher hät nie gfehlt !!!

Alli händ sich uf ihres Bett gfreut. Die Meiste händ Einzelzimmer buechet, für älteri Dame isch das scho herrlich. D‘ Zimmer sind gross und sehr schön und suber gsi.

Mäntig: 13.6.

Es hät gschiffet!!! Am halbi achti sind mir scho uf de Turnmätteli gstande im schöne Wellnessberiech. D‘ Brigitte, e herzigi Gymnastiklehrerin hät euis mit langsame, schöne Uebige zu ganz finer Musik chönne begeistere.Die Turnstund händ mir jede Morge vor em Z’Morge bsuecht.

Am 10i hät euis d’Juniorchefin und ihre Brüeder durs Dorf gführt. S’Holzheizwerk wo s‘ Hotel Krone, s’Rathus etc beheizt händ mir chönne go besichtige. Au en Holzschnitzelbetrieb isch interessant gsi. Mit de richtige Behandlig vom Holz, sowie ere spezielle Technik sind die Dächer und Hüserfronte für villi Jahrzehnt vor Unwätter gschützt. Die grossi Chile wo nach de Plän vome Architekt us Frauefeld  errichtet worde isch, isch en Bsuech wärt gsi.

E Chrüterexpertin hät euis am Nachmittag rund ums Hotel gführt und euis unzähligi Pflanze, Blueme und Chrütli erklärt. Die Frau hät es enorms Wüsse. Sie hät euis au uf Gfahre ufmerksam gmacht, z.B. Maieriesli und Bärlauch. Also ässed nur, was er känned!!! Z'rugg im Hotel hät sie euis Holundersirup, sälber gmachts Brot mit Quark mit div. Chrütli zum Probiere gä.Lecker, lecker !!!

Die ganz Nacht häts wieder i Ströme grägnet!!!

Ziestig: 14.6.

Am früehe Morge häts immer no gschifft, aber mir Turnerinne sind ja au bi schlächtem Wätter unterwägs. Am 10i sind mir per Bus nach Bezau gfahre.  Vo Bezau bis Schwarzenberg fahrt s‘ Wälderbähnle e Museumsbahn wo ehreamtliche Isebahnfans als Heizer, Lokiführer oder Fahrdienstleiter im Isatz sind. E Gsellschaft hät e Fahrt buechet gha und so händ mir dörfe mitfahre imene alte Wage mit Holzbänk, Läderrieme zum d‘ Fenster uftue. Mir händ euis öppe 50 Jahr zruggversetzt gfühlt. Sogar im Kartonbillet händ mir sälber törfe s‘ Löchli mache.Mir händ natürlich es uuu Gaudi gha!!!!!

Zrugg in Bezau isch de Wäg am Grabebach entlang verbi a schöne Gärte heimelige Hüser, aber au baufällige Hüser gange.  Und trotzdem hät die Eint oder die Ander dänkt sie wetti viellicht de Läbesabig im Vinzenzheim verbringe!!!!!!

D‘ Seilbahnstation isch scho in Sicht gsi und au d‘ Sunne hät vüreglueget.

Bim Rest. Panorama acho sind mir mit ere wunderschöne Ussicht belohnt worde, sogar de Bodesee händ mir gseh.Vor ere Rundwandrig isch natürlich no es Süppli fällig gsi. Aber nach dem chline Imbiss isch e dicki Näbelwand ufzoge. So isch d‘ Fahrt zrugg mit de Luftseilbahn e klari Sach gsi.

Aber Turnerinne lönd sich wäg dem Näbel de Tag nöd vermiese!!! Es isch eifach wieder schön gsi.

Mittwuch: 15.6.

Nei, es hät nöd grägnet!!

Nach de Morgegymnastik händ mir euis trännt. 5 sind z‘ Fuess nach Schoppernau und mir 7 händ chönne Walkingstöck uslehne. Wo mir d‘ Strass händ welle überquere, händ 20 Töff für euis 7 Fraue aghalte. Mir sind natürlich im hohle Chrüz über d‘ Strass stolziert.

Am Nachmittag isch für euis aber klar gsi, mir wänd au nach Schoppernau. Uf em Wäg händ mir die schöne Hüser und die sehr pflägte Gärte bewunderet. Plötzlich sind mir vor eme iladende Café gstande. Mir händ natürlich nöd chönne widerstah, trotzdem das es sehr äng gsi isch händ alli es Plätzli gfunde. Jedi hät aber nur es halbs Stuck Chueche welle, aber alli händ en Täller und  Serviettli übercho. So fründlich isch s‘ Personal überall im Bregenzerwald. Schwiezer, ihr chönntet no viell lerne. Mir händs so lustig gha i dem chliene Café, händ aber au en Saulärme veranstaltet, aber d‘ Serviertöchter händ Freud gha a euis, schön, wenn ihr so lachen könnt!!!

I de Käserei im Dorf isch euis en Film zeiget worde. I dem Vorführrum isch es dunkel gsi, so händ glaub ich alli mit em Schlaf z‘ kämpfe gha. Es wär besser gsi, mir hetted chönne de Käser diräkt bim Schaffe zueluege.

De Apéro vor em z’Nacht isch herrlich gsi!!!

De Fuessballmatch Schwiez – Rumänie isch uf ere Grosslienwand übertreit worde, de händ mir natürlich nöd welle verpasse!!!

Es Gitarrekonzert i de Hotelhalle gspillt vo junge musikalisch begabte Künstler isch allwäg für euis echli z‘ hochstehend gsi……

Dunnstig: 16.6.

Hüt isch euises Ziel de Diedamskopf gsi. De Wäg nach Schoppernau z’laufe und zwar bi herrlichem Sunneschi händ alli gnosse. So isch die wunderschön Landschaft besser zur Geltig cho. Ime chline Lädeli wo’s Käse und Würscht verkauft händ, sind d‘ Inahme nach euisem Bsuech markant  gstiege. Mir sind begeisteret gsi vome neu eröffnete Restaurant imene uralte Huus. Es jungs Ehepaar hät das heimelig Stübli mit vill Liebi igrichtet, alles us Holz, wie zu Grossmuetters Zite. Mir händ nur en Holunderbluetesirup trunke, aber die herzig Wirtin hät no 12 Schnäpsle spendiert.

Mit 8 er Gondeli sind mir uf de Diedamskopf gschwebt. Dobe häts aber  no Schnee gha. Ja uf de Terrasse händ mirs nöd so lang usghalte, dänn scho bald isch wieder en liechte Näbel cho. Aber Kafi u. Chueche häts ja au im Rest. dine gä. Euisi 12 köpfig Gruppe isch sicher scho vo wietem z’ghöre gsi. Ja wänn so vill glachet und gschwätzt wird isch das halt scho en Saulärme….

Aber bald sind mir wieder i d’Gondle gstiege, a de Talstation sind no e paar Ichäuf tätiget worde. Per Bus händ mir immer wieder diräkt vors Hotel chönne fahre. Mit de Gästecharte händ mir für Bus – und Seilbahnfahrte  nüt müese zahle.

Fritig: 17.6. Ja, de letschti Tag isch abroche und chum zum glaube, d‘ Sunne isch vürecho!!

Nach em z’Morge isch es as Packe gange. Uf de Terrasse händ mir uf euisi 2 Taxis gwartet. Plötzlich isch d‘ Polizei vorgfahre und div. Autos mit Velos uf em Dach sind verbigflitzt.

D‘ Tour de Suisse isch a euisem Hotel verbigfahre. Ich glaub niemer vo euis hät scho so vill knackigi Fahrer so nöch gseh!!!

Wo de Tross verbi gsi isch, händ au euisi Taxis chönne zufahre. Eine vo de Fahrer hät d‘ Strass mit em Nürburgring verwechslet…

In Bregenz hät de Zug nach Winterthur 1 Std. Verspötig gha. Im Zug en Sitzplatz z’ergattere isch scho schwierig gsi, aber euisi Koffere z’verstaue isch fast nöd möglich gsi.Aber alli händ enand ja gholfe, wie scho uf de Hifahrt !!!! Müed, aber glücklich sind mir z‘ Schaffhuse acho. Es sind 5 tolli Tag gsi, trotz em schlächte Wätter händ mirs immer lustig gha und d‘ Kameradschaft isch wie uf alle Reise eifach super gsi. Ob mir nomal mit em Zug würded reise???? Ich weiss nöd….  

zurück zur Übersicht