Bergturnfahrt Kandersteg 5. - 6. September 2015

Bild vergrössern
Bild vergrössern

Uff, am Samstig, 5. September händ mir 14 Fraue scho müese am halbi 5 i ufstah. Ja wänn mer halt is Berner Oberland reist, mues me nach de 6e abfahre. Mir händ e chli ghofft, dass d‘Erika für euis wieder de Zmorge mitbringt. Und tatsächlich, im Zug vo Zürich nach Bern sind mir verwöhnt worde mit Zopf, Butter und Konfi. Super, danke Erika.

 

Z‘Bern händ mir zerscht nöd gwüsst wo und wänn de Zug nach Kandersteg abfahrt. He ja, es isch halt en Extrazug gsi und mir sind halt scho no chli Landeier. Aber am halbi 9 i sind doch alli im Zug gsässe. Alli Blick sind zum Himmel ufe. „Schient ächt hüt z Sunne, oder chunnts cho rägne“?? Ja s‘2. Hät zuetroffe, z‘Kandersteg isch es stark bewölkt gsi und sehr kalt. (Und das nach dem heisse Summer.)
S‘ Hotel Blüemlisalp händ mir nach eme 15 minütige Fuessmarsch dur‘s Dorf erreicht. So händ mir die alte schöne Holzhüser chönne bestuune!! Vor em Hotel acho, händ mir vo wietem Gloggeglüt ghört. Isch ächt das für euis als Empfang??? Aber nei, es isch en Alpabzug diräkt vor em Hotel dure, wunderschön!
Nachdem die grosse Rucksäck i de Zimmer verstaut gsi sind, isch en Kaffi nötig gsi. Nachher händ mir euis i 3 Gruppene ufteilt:

 

Die ganz Schnälle

 

Die Schnälle und

 

Die Gmüetliche

 

D‘ Christine und d‘ Susanne sind z‘ Fuess is Gasterntal marschiert. Die ander Gruppe isch per Bus ufegfahre.Nach eme chliene Z’Mittag mit Blüemlisuppe etc. hät sich die 2. Gruppe uf de Wäg nach Kandersteg gmacht und das bi Nieselräge und chalte Temperature. D’Karin Sepp öisi Präsidentin hät schients eso chalti Finger gha, dass sie de Riessverschluss vo ihrne Hose nüme hät chönne zuemache!!! Zum Glück händ mir kein Präsident !!

Bild vergrössern
Bild vergrössern

Für die Gmüetliche isch de Blausee uf em Programm gstande:

Der Blausee ist dank seiner ganz speziellen Farbe und des kristallklaren aus unterirdischen Quellen stammenden Wassers einer der bekanntesten Bergseen der Schweiz. Er liegt inmitten eines 20 Hektar grossen Naturparks, dessen Landschaft durch einen Felssturz geformt wurde, durch den auch der See entstand.

 Trotz em liechte Räge sind mir um de See gloffe, über Holzbrüggli, verbi a schöne Picknickplätz. Aber zum dusse sitze isch es z’chalt gsi, so sind mir froh gsi, wo mir händ chönne e warmi Suppe ime noble Hotel gässe. E Hochzytsgsellschaft isch no im Hotel itroffe. Ganz en junge Brütigam, sim Gsichtsusdruck a häts im gstunke!!!.

 

Uf de Zruggfahrt hät euis de Chauffeur zeiget wo de Ogi wohnt. Aber mir sind ihn nöd go bsueche, obwohl er sicher uuuuuu.. Freud gha het !!!!

 

Imene Sportgschäft in Kandersteg hämmer doch gstunet, wo die 2 nasse grosse Hünd wo ehner sträng g’schmöckt händ  im Lade gläge sind und bället händ. Z‘ Abig händ mir erfahre, dass e paar vo euisne Turnerinne hetted sölle d’Rucksäck abzieh bevor sie in Lade cho sind….So chan me au es Gschäft füehre!!!

 

Bim Apéro im Hotel händ mir euis alli wieder troffe.

 

Nach eime feine 4-Gang Menue sind mir no bis öppe am 10i zämegsässe, das isch ebe Gmüetlichkeit. Mir händ schöni Zimmer gha, obwohl es Kajüttenbett i eusem Alter nöd optimal isch. 

Bild vergrössern
Bild vergrössern

Sunntig Morge, herrlichs Wätter. Nach eme usgiebige Z’Morge händ mir euis wieder i 3 Gruppene ufteilt. Die einte sind z‘ Fuess an Oeschinensee uf 1578 m. Die andere händ sich mit de Gondelbahn ufefahre la. Vo de Gondelbahnstation bis zum wunderschöne See sinds öppe 20 Min. gsi. Die fite Wanderinne händ d‘ Rundwanderig Underbergli, Oberbergli und wieder zrugg an Oeschinensee i öppe 3 ½ Std. gschafft gha.
Mir händ e churzi Wanderig am See entlang  gmacht und händ nachher es feins Mittagässe uf de Sunneterrasse gnosse. Wo mir wieder z‘rugg Richtig Gondelbahn Station gloffe sind, händ mir es unheimlichs Grolle uf de andere Site vom See vernoh. En Felssturz!!! Es hät immer wieder klöpft und tätscht. D’Trudi Weber und ich händs welle e chli besser gseh und sind es Bord duruf klätteret. Aber oha… 2 Chüeh wo det obe gweidet händ sind euis nahkeibet, rächt ungmüetlich.
E paar Turnerinne sind no nach Kandersteg abegloffe, die andere händ die eifacher Variante ( Gondelbahn ) gwählt. Glücklich und z‘friede sind nach und nach alli uf de Hotelterrasse itroffe. E Stärkig händ jetzt alli verdient gha!! Wo d’Wirtin es Tablett mit Bier, Thé und Milch hät welle uf de Tisch stelle,isch es an Bode tätscht. D’Marlies und d’Wirtin sind vollgsprützt gsi. Defür händ alli wo a dem Tisch gsässe sind es Trinke gratis übercho!!! Nobel!! Es isch überhaupt sehr es guets Hotel gsi.
Nach de 5e häts gheisse Abschied näh vo Kandersteg. De Zug Richtig Bern isch pumpsvoll gsi, zum Glück händ mir alli no en Sitzplatz verwütscht.

Vo Bern nach Zürich hät d‘Nelly wie immer die ogligate Kirschstängeli verteilt. Danke Nelly.

 

Kurz nach de 8te sind mir wieder in Schaffhuse acho. Mir händ es tolls Wuchenänd dörfe erläbe. Kameradschaft isch halt bi euis immer a oberster Stell!!
Danke Erika, für die guet Organisation. Du suechsch immer es Ort us wo me ½ stündigi bis 4 stündigi Wanderige cha undernäh, so chönd immer alli mitcho.

 

Bild vergrössern
Bild vergrössern

Die Wanderig hät sich sehr i d‘ Längi zoge, ca. 3 ½ Std. E tolli Leistig.

 

 

 

Die 2 ganz Schnälle sind per Bus ufere abentürliche Fahrt zrugggfahre. Christine, du chasch das verzelle!!:


Noch enerä landschaftlich schöne Wanderig im Nieselrägä händ d`Susan und ich beschlosse, de privati Shuttlebus zrugg is Tal z`nää. Es isch en alte Göppel gsi wo üs erwartet hät . Ich mein natürlich s`Auto nid de Chaufför . Agfange hat's eigentlich ganz guet, hämmer doch e Schämeli übercho zum knapp 40 cm z`überwinde und möglichscht komfortabel i da Büssli i z`stiege. Und scho isch äs losgangä .Zerscht  händ d`Passagier no ganz entspannt  gschwätzt aber scho noch de erschte paar Kurve isches mucksmüsli still worde im Bus.

Mich hät`s Los troffe,diräkt i de mitti hinderem Chaufför z`sitze und ich ha ziemlich schnell gmerkt, da ä wildi Mus a de Chilbi än Dreck gege da isch, wa mir grad erlebed. Ich ha nümmä chöne still sitze und ha de Schaufför gfröget wa är denn macht, wenn  äs Auto entgege chunt. Will bremse unmöglich funktioniert hett uf dem rutschige Mergel und uswiche bi sonerä schmale Stross inerä ungwollte Flugstund gändet het.

Är hät höflich hinderä gluegät, hät Augekontakt mit mir gsuecht und usführlich erklärt:"Jo wüssed sie, äs isch immer ä halbstund Bergfahrt und ä halbstund Talfahrt erlaubt." Selber han ich schier Zueständ übercho und mit mir die anderä Passagier au.Da är nid uf d`Stross gluegät hät , während däre Erkllärig. Ich het mir am liebschtä Zunge abbissä und ha natürlich unweigerlich en Schweissusbruch gha vor Angscht. Ganz zu schweigä wenn än anderä Automobilischt  kei exakti Ziit,oder sogar ä Panne gha hett. Lachend hät er gmeint. "Bahn isch also frei!!!" und är hät glaub grad no chli meh Gas geh. Mir händ üs witerhin a dä Sitz feschtklammerät, well Sicherheitsgurte häts keini gha und gnützt hettits jo au nid viil - und händ ä paar Stossgebet zum Himmel gschickt.

Doch nonig gnueg, bi de nörschte Kurve hani nu no Himmel gseh und vor Schreck luut geusset, au d`Susan näbed mir häts nume luschtig gfunde¨, isch mit ihrem Füdli scho über äm Abhang glampet. Und wa macht üsen Chaufför, er nimmt äs Handy füre und fangt a SMS z`schriibe, - ich informier mich i minerä Verzwieflig die anderä Passagier: "Hey," han ich gseit, "üsen Chaufför chan au no a sim  Handy umespielä, wärend är üs eigentlich sicher mösst is Tal bringe", da isch denn zviel gsi für mich, und au dä Rescht vo dä Passagier. Vor luuter Schwitze sind d"Schiebä aaglaufä und är hät chum meh usse gseh. Uf arohte vo de Susan händ mir de Rescht  vo dä Fahrt mit gschlossne Auge knapp überstande. Ziemlich noch amenä Herzinfarkt.

Aber s`nörscht mol chömed mir trotzdem wieder mit--- gäl Erika!

Uebrigens einigi vo euisne Turnerinne chönd sich sicher no erinnere, dass mir scho mal im Gasterntal gsi sind……und zwar uf de ominöse Turnfahrt vom Lötschepass..aber do sind mir no jung und chnusprig gsi.. 1996 !!